Në Komisionin Parlamentar të Edukimit është diskutuar këtë të premte nisma e deputetëve të mazhorancës, për reformimin e Akademisë së Shkencave. Eglantina Gjermeni ka thënë se ky ligj synon jo vetëm ta reformojë, por edhe ta bëjë funksionale Akademinë e Shkencave.
“Rëndësi ka fakti që projektiligji synon ta reformojë, por duhet ta bëjë edhe të funksionojë. Jemi në një situatë alarmante, ka nevojë për një projektligj për ta përmirësuar, për ta bërë të zbatueshëm. Sipas ligjit, parashikohet të ndërtohen edhe institutet shkencore”, ka thënë Gjermeni.
Gjithashtu, Fidel Ylli ka folur edhe për nevojën e ndërtimit të një godine të re dhe të përshtatshme për Akademinë e Shkencave. I pranishëm në mbledhje, ishte edhe kryetari i Komisionit Reformues për Akademinë, Skënder Gjinushi. Deputetët nismëtarë kërkuan më shumë buxhet nga ana e qeverisë për këtë nismë.
Debati për Akademinë e Shkencave është rikthyer sërish në vëmendjen e opinionit publik gjatë ditës së sotme. Shkak është bërë jo vetëm mbledhja e Komisionit të Edukimit, por dhe një postim i Ministres së Arsimit Besa Shahini, e cila ka thënë se nisma e deputetëve dhe e grupit të punës për reformimin e këtij institucioni do të shkojë së shpejti në Parlament.
Në një letër publike drejtuar Presidentit, Kryeministrit dhe Kryetarit të Kuvendit, akademiku Artan Fuga hedh dyshime se po synohet shkrirja e Akademisë së Shkencave. Fuga shkruan se mbetet i paqartë mendimi i Besa Shahinit se çfarë nënkupton me “integrimin e akademive shqiptare në një të vetme”./Opinion.al
