Ditën e djeshme u nda nga jeta në moshën 67-vjeçare publicisti dhe botuesi i njohur Arben Xoxa. E pikëlluar nga humbja e të atit, e bija e tij, Ajola Xoxa, bashkëshortja e kryetarit të Bashkisë Tiranë, Erion Veliaj, ka postuar në profilin e saj në rrjete sociale dy fotografi teksa në mbishkrimin e tyre ndër të tjera shkruan se e humbi të atin pas një lufte të vështirë me një monstër si kanceri.
Arben Xoxa lindi në Tiranë më 1 maj 1952 dhe studioi Gjuhë Shqipe – Letërsi. I specializuar si kritik arti Xoxa ka punuar si pedagog në Universitetin e Tiranës, drejtues në Ministrinë e Arsimit, Akademinë e Shkencave, RTSH dhe më pas prej vitit 1996 si Drejtor i Shtëpisë Botuese Enciklopedike.
Prej rinisë ai ishte i angazhuar në shtypin vendas dhe të huaj, duke botuar shkrime dhe studime të shumta. Homazhet në nderim të tij u zhvilluam ditën e sotme ora 10:00 pranë Akademisë së Shkencave, tek Biblioteka./E.M
