Rishfaqen zërat për largimin e Arlind Ajetit nga Torino gjatë merkatos së janarit. Mbrojtësi i përfaqësueses shqiptare jo vetëm që nuk po gjen hapësira te klubi i Serisë A, por duket se nuk ka bindur trajnerin Sinisha Mihajloviç, i cili në konferencën e sotme për shtyp deklaroi se nuk ishte i kënaqur nga ajo që kishin shfaqur zëvendësuesit.
“Askujt nuk i është mohuar mundësia për të treguar vlerat, por jo të gjithë e shfrytëzuan atë”, deklaroi sot në konferencë për shtyp trajneri serb, fjalët e të cilat në mediat italiane janë interpretuar si sinjal i qartë për 6 futbollistë, mes të cilëve edhe mbrojtësi shqiptar.
Sipas “toro.it”, portal i cili ka burime të sigurta brenda klubit, emrat që pritet të sakrifikohen në janar për t’i bërë vend të tjerëve janë Ajeti, Obi, Akuah, Maksi Lopez, Martinez dhe Boje. Klubi është i hapur për transferimin e tyre në formë huazimi apo shitje përfundimtare në merkato, për të afruar futbollistë të cilët Mihajloviç i cilëson më të përshtatshëm për lojën e ekipit.
Për Ajetin ndikon edhe fakti se nuk ka qenë trajneri serb ai që ka kërkuar blerjen e tij, por drejtori sportiv Petraki. Kësisoj, edhe hapësirat për të kanë qenë më të vogla, ndonëse futbollisti i përfaqësueses shqiptare ka lënë plotësisht pas dëmtimet që e ndalën në fillimin e sezonit, kur dukej se mund të luftonte për një vend mes titullarëve.
