SPAK ka rekomanduar emrin e Aida Hajnajt për pozicionin e drejtueses së Byrosë Kombëtare të Hetimit. Struktura e Posaçme Anti-korrupsion propozoi Hajnajn në Këshillit të Lartë të Prokurorisë pasi vlerësoi se ajo ishte e vetmja nga kandidaturat që i plotësonte kriteret e kërkuara.
Aida Hajnaj Veizaj ka një eksperiencë të gjatë në polici. Ajo ka ushtruar detyrën e shefes së sektorit për Hetimin e Pastrimit të Parave në Drejtorinë për Hetimin e Krimit Ekonomik e Financiar dhe Drejtore e Përgjithshme e Shërbimit të Çështjeve të Brendshme dhe Ankesave (SHÇBA) në Ministrinë e Brendshme.
Më pas u emërua nga ministri i atëhershëm Fatmir Xhafaj si drejtuese e Drejtorisë për kufirin dhe Migracionin.
Ajo u prezantua nga Drejtori i Përgjithshëm i Policisë, Ardi Veliu si zëvendëse e tij më 15 shkurt të vitit 2018.
Veizaj ishte e vetmja grua mes 4 kandidatëve për Byronë Kombetare të Hetimit. Kandidatët e tjerë ishin Artur Beu, Ervin Hodaj dhe Idajet Faskaj. Këta të fundit u skualifikuan nga gara pasi sipas verifikimeve të kryera nuk i përmbushën të gjitha kriteret.
Këshilli i Lartë i Prokurorisë (KLP) do të mblidhet të enjten për të votuar që zëvendësdrejtorja e përgjithshme e Policisë së Shtetit të marrë drejtimin e një prej institucioneve më të rëndësishme të luftës kundër korrupsionit.
Byroja Kombëtare e Hetimit ishte i vetmi institucion i paplotësuar ku tani me zgjedhjen e drejtores, do të nisë edhe procedura e përzgjedhjes së oficerëve të policisë gjyqësore që do të jenë hetuesit e kësaj strukture. 4 kandidatët që shkuan deri në fund të procesit arritën të kalojnë testin fizik, testin me shkrim dhe me gojë si dhe provën tek makina e së vërtetës ose poligrafi.
Byroja Kombëtare e Hetimit është strukturë e specializuar e Policisë Gjyqësore, që heton veprat penale në juridiksionin penal të Prokurorisë së Posaçme. Veprat penale që do të hetohen nga anëtarët e Byrosë nën drejtimin e prokurorëve specialë janë krimi i organizuar dhe korrupsioni në nivelin e lartë. /Opinion.al
