Ministri në detyrë i Financave, Arben Ahmetaj doli sot para medias për tu thënë studentëve se të gjithë do të përfitojnë nga përgjysmimi i tarifave. Po kështu ai theksoi se Këshillat Bashkiake zyrtarisht nuk kanë më punë me bursat e studentëve.
Ai theksoi se studentët që e kanë paguar tarifën e plotë para Janarit, do tu kthehen paratë.
“Studentët me notë mesatare nga 5 deri në 9 përfitojnë përgjysmim të 50% nga tarifa së shkollimit. Përfitojnë rreth 70 mijë studentë të cilëve iu bëhet mesatarisht tarifa, 9700 lekë në vit. Për studentët që kanë paguar tarifën e plotë vjetore të shkollimit, Bordet e Administrimit marrin vendim për rikthimin e shumës së paguar në llogari bankare”, u shpreh Ahmetaj.
Po kështu ai i bëri thirrje universiteteve të punojnë 24 orë për të kaluar të dhënat për studentët në mënyrë që të mos krijohen vonesa në plotësimin e kërkesës së studentëve dhe në akordim të bursave.
