Ministri i Rindërtimit, Arben Ahmetaj iu është përgjigjur akuzave në lidhje me shtëpitë e dëmtuara nga tërmeti i 26 Nëntorit në Laç.
Përmes një videoje të postuar në Facebook, Ahmetaj sjell pamje të cilat ai thotë se janë nga kantieri i ndërtimit në të cilin breda 3 muajve do të ngrihen pallatet e rinj.
“Sot në Laç, ku vijon me intensitet puna për ndërtimin e lagjes së re, që do të jetë jo vetëm qendra e Laçit të së ardhmes, por edhe modeli i ri i zhvillimit të zonave urbane, sociale dhe ekonomike në vend.
Kompania turke është angazhuar, pas një faze po kaq intensive përgatitore të terrenit, që për tre muaj të fillojnë të ngrihen pallatet e rinj, e të marrë formë lagjia e parë e rindërtuar pas tërmetit.”, shkruan Ahemtaj.
#TiNukDoJeshKurrëVetëm❤
Sot në Laç, ku vijon me intensitet puna për ndërtimin e lagjes së re, që do të jetë jo vetëm…
Posted by Arben Ahmetaj on Friday, August 28, 2020
Procesi i rindërtimit të banesave në Laç është marrë përsipër të kryehet nga qeveria e Turqisë si pjesë e ndihmës së saj për tragjedinë e ndodhur në fund të vitit të kaluar.
Projekti përfshin ndërtimin e 524 apartamenteve, në një truall rreth 72 mijë metër katrorë.
Sipas Ahmetajt ai do të përfshijë hapësira të gjelbëruara e parkimi për banorët, njësi shërbimi dhe qendrën tregtare.
Disa ditë më parë ish-deputeti demokrat i zonës së Kurbinit, Andon Frrokaj akuzoi kryeministrin Rama për shfaqje propagandistike me punimet për ndërtimin e banesave në Laç pas tërmetit.
Ai publikoi disa pamje nga kantieri i zbrazur, pa punëtorë apo makineri.
Frrokaj akuzoni qeverinë dhe Bashkinë e Laçit se nuk po zgjidhin probleme me dokumentacionin, gjë që ka vonuar nisjen e ndërtimit të banesave. /Opinion.al
