Sot në rrjetet sociale dhe mediat on line, qarkulloi një video e ministrit të financave Arben Ahmetaj dhe ish kryebashkiakut të Kavajës Elvis Rroshit. Në këtë kronikë Rroshi cilësohej nga Ahmetaj si kryebashkiaku i Kavajës, gjatë një takimi elektoral. Lidhur me këtë ka reaguar edhe lideri i opozitës Lulzim Basha, i cili e ka quajtur një skandal politik. Ai ka theksuar se kjo është një tjetër dëshmi që sipas tij, kryeministri Edi Rama është i lidhur me krimin. Me këtë veprim sipas Bashës, Rama e ka bërë zero, përpjekjen e opozitës dhe të partnerëve ndërkombëtar për ligjin e dekriminalizimit.
Ja reagimi i plotë i liderit të opozitës:
Elvis Roshi i dënuar në Itali dhe Zvicër për përdhunim dhe trafik droge, me mandat të hequr si pasojë e ligjit të dekriminalizimit, mbetet i plotfuqishmi i Edi Ramës në krye të Partisë Socialiste të Kavajës dhe de fakto në krye të bashkisë së qytetit.
Dalja e tij krah për krah me Arben Ahmetajn si drejtues i fushatës zgjedhore në Kavajë është skandal politik dhe shkatërrim i procesit të dekriminalizmit. Me veprimin e tij, Edi Rama e ka bërë zero përpjekjen e mundimshme të opozitës e partnerëve ndërkombëtarë dhe vullnetin e popullit për hartimin dhe zbatimin e ligjit të dekriminalizimit.
Kjo është një tjetër dëshmi se Edi Rama nuk ndahet dot nga krimi. Nuk ndahet dot nga trafikantët dhe droga. Prandaj nuk e e do votimin dhe numërimin elektronik. Sepse kështu nuk e ndihmon dot as ai krimin, as krimi atë. Zgjedhjet e lira janë fundi i krimit në politikë. Më Shkut NgrihemiBashkë për t’i prerë rrugën krimit në politikë./opinion.al
