176 mijë qytetarët që do të përfitojnë nga paketa e dytë ekonomike, do të paguhen brenda datës 5 Maj. Kështu u shpreh në studion e emisionit “Opinion”, Koordinatori për Situatën Ekonomike të COVID-19, Arben Ahmetaj.
Ndërsa deklaroi se hyrja e paketës së dytë lindi si domosdoshmëri pas aplikimit të paketës së parë dhe si rezultat i lëvizjes ekonomike, Ahmetaj tha se deri tani nga paketa e parë janë paguar më shumë se 20 mijë persona, ndërsa ky proces do të vijojë.
“Muaji i parë verifikon punonjësit e larguar nga puna ose me aktivitet të pezulluar dhe më pas procesi vazhdon shumë më shpejt”, tha Ahmetaj duke deklaruar se pagesat e paketës së dytë do të nisin më 20 Prill dhe do të përfundojnë më 5 maj.
Nga paketa e dytë, efekti i së cilës është deri në fund të muajit Maj, përfituesit janë të ndarë në tre kategori kryesore:
40 mijë lekë të reja për 10 mijë punonjës në turizëm.
40 mijë lekë të reja për 66 mijë punonjës që janë larguar ose pezulluar nga biznesi i madh.
40 mijë lekë të reja për 100 mijë punonjës në bizneset e vogla, që kanë punuar me xhiro minimale dhe nuk përfituan nga paketa e parë. /Opinion.al
