Pasi Agron Shehaj shkoi në zyrën e Edi Palokës, për të verifikuar firmat e delegatëve të njësisë 5 e 7 për Kuvendin e 11 dhjetorit, ka ardhur edhe reagimi i degëve të Partisë Demokratike në Tiranë.
Përmes një reagimi të përbashkët në rrjetet sociale, dega 5 dhe 7 e PD shkruan se ajo që bëri Shehaj ishte një show mediatik.
Sipas tyre Agron Shehaj ka dështuar në verifikimet e firmave sepse as ai nuk e njeh bazën e partisë. Në reagim shkruhet se, si drejtues politik i degëve 5 dhe 7, Shehaj nuk ka bërë asnjë takim me demokratët që prej ditës që u zgjodh deputet.
“DEKLARATË E PERBASHKËT E DEGËVE 5 DHE 7 TË PARTISË DEMOKRATIKE TIRANË
Show mediatik i Agron Shehajt me demokratët konfirmoi se interesi i tij i vetëm është protagonizmi personal. Agron Shehaj dështoi të verifikojë firmat e demokratëve, sepse ai as nuk e njeh bazën e partisë, as nuk e respekton atë. Si drejtues politik i degëve 5 dhe 7 në Tiranë, Agron Shehaj nuk ka bërë asnjë takim me demokratët që prej ditës që u zgjodh deputet.
PD në degën 5 dhe 7 në Tiranë e kudo ka vendosmërinë për të mos lënë demokratët në baltë dhe të mos lejojë nëpërkëmbjen e dinjitetit të tyre. Ne jemi në krah të demokratëve dhe interesit të Shqipërisë, me misionin e vetëm për rrëzimon e regjimit të Edi Ramës dhe rikthimin e PD në pushtet”-shkruhet në reagimin e degëve 5 dhe 7 të PD në Tiranë./Opinion.al
