Partia Mundësia e Agron Shehajt e ka bërë të qartë synimin e saj: të sjellë frymën e meritokracisë dhe njerëzve që punojnë dhe të arrijë të krijojë një grup parlamentar. Ndërkohë, fushata ka tërhequr vëmendje për shkak të përfshirjes së të rinjve, frekuentimit të furrave të bukës, supermarketeve nga Agron Shehaj duke u shërbyer qytetarëve.
Kamera e emisionit “Opininon” në Tv Klan e ndoqi përgjatë një dite ku ai merret me angazhimet e tij duke takuar qytetarët në 3 qytete të Shqipërisë. Gjatë intervistës, Shehaj shprehet me vendosmëri se nuk po merr votat e askujt por do të jetë alternativa e parë e djathtë.
“Ne nuk duam të jemi një Parti Demorkatike e dytë. Ne duam të jemi një parti e djathtë e parë. Për çfarë po e bëjmë gjithë këtë? Pse e kemi krijuar një parti të re politike të djathtë? Sepse mendojmë se mund t’i bëjmë gjërat më mirë, sepse mendojmë që jemi më modernë, kemi një vizion më të mirë, kemi një plan më të mirë, për këtë arsye kemi hyrë në politikë. Ky është një projekt politik afatgjatë që absolutisht synon që të jetë altenativa e parë e qendrës së djathtë dhe për të gjithë ata që thonë që jo po Agroni do të marrë votat e Partisë Demokratike, nuk ka, votat nuk janë as të Partisë Demokratike, as të Partisë Socialiste, votat janë të qytetarëve të cilët zgjedhin alternativën më të mirë dhe kjo është demokracia”, tha Shehaj
