Kryetari i Partisë Mundësia, Agron Shehaj, ishte i ftuar në emisionin “Opinion” në Tv Klan këtë të mërkurë. Ai u shpreh se partia e tij e ka mbështetjen më të madhe në Qarkun e Tiranës.
Sipas Shehajt, Partia Mundësia, është forca e tretë politike në të gjitha qarqet sipas sondazheve.
“Tirana është qarku ku kemi më shumë mbështetje, por një gjë është e sigurt. Ne jemi qartësisht forca politike e tretë në rang kombëtar. Në Tiranë po e po, me një diferencë shumë të madhe nga dy partitë e tjera të reja, por jemi parti e tretë pothuajse në të gjitha qarqet. Po flas sipas sondazhet. Të gjitha sondazhet fotografojnë këtë situatë, na nxjerrin forca e tretë në të gjithë Shqipërinë”, tha Shehaj.
I pyetur për një parashikim të mandateve që mund të marrë partia e tij në zgjedhje, Shehaj u përgjigj kështu.“Unë i qëndroj fakteve. Nuk më pëlqen të fluturoj. E vetmja parashikim që mund të bësh është në bazë të sondazheve. Po të shikosh sondazhet nëse na nxjerrin rreth 10%, fatkeqësisht sistemi elektoral nuk ka jep mundësinë të marrim 10% të mandateve, por mund të jetë një numër i përafërt. Më pak se 14. Flas mesatarisht“, tha ai.
