Nesër opozita ka thirrur protestën e saj kombëtare të radhës kundër qeverisë. Sipas përfaqësuesve të opozitës kjo është një luftë kundër një sistemi dhe jo kundër një njeriu të vetëm. Ditën e sotme ish-deputeti Agron Shehaj, në një deklaratë foli për modelin ekonomik që është ngritur në Shqipëri me qeverisjen e kryeministrit Rama.
Duke marrë shkasë nga samiti i fundit i vendeve të Ballkanit Perëndimor, në Poznan të Polonisë, Shehaj deklaroi se sot Shqipëria është vendi më i izoluar nga tregu europian dhe ekonomia europiane. Prandaj ai e cilësoi si prioritet kombëtar rrëzimin e këtij sistemi ekonomik.
“Shqipëria nuk mori asgjë nga ky samit, asnjë qindarkë dhe asnjë mbështetje ekonomike”, tha Shehaj duke shtuar se “vendet e tjera të Ballkanit morën dhjetëra e qindra miliona euro falas, kurse Shqipëria mori një foto me të cilën mburret Kryeministri në Facebook”.
Kjo vendimmarrje e përfaqësuesve të BE, sipas Shehajt, erdhi sepse Shqipëria nuk ka paraqitur asnjë projekt konkret për të thithur investime të huaja. Kjo gjë sipas tij bëhet në fakt me qëllim për të izoluar ekonominë shqiptare.
“Që të mos ketë trysni nga kompanitë dhe qeveritë e huaja, në mënyrë të qëllimshme EdI Rama e ka izoluar ekonomikisht Shqipërinë nga bota, duke mbajtur larg projektet e huaja dhe investitorët e huaj. Shqipëria dhe Koreja e veriut janë të vetmet vende në botë që nuk kanë patur investime të huaja në këto 6 vite. Zero investime të reja ka marrë Shqipëria nën qeverisjen Rama” tha Shehaj.
Sa i përket projekteve infrastrukturore dhe të shërbimeve brenda vendit, ai tha se ato i janë dhënë nëpërmjet koncesioneve kompanive vendase dhe lindore në mënyrë kilenteliste.
“Miliarda euro koncesione janë dhënë por asnjë prej tyre nuk i është dhënë ndonjë kompanie të huaj. Të gjitha u janë dhënë kompanive të klientëve të qeverisë, pa asnjë kapacitet dhe përvojë. Nga ana tjetër, qeveria qëllimisht ka nxitur largimin e investitorëve perëndimorë duke i zëvendësuar ata me lindorë ose vendas. Nga Deutsche Telecom dhe T-mobile tek Sheratoni, tek bankat më të rëndësishme franceze dhe kompanitë farmaceutike më të mëdhaja në botë janë larguar. Të gjithë janë zëvendësuar me investitorë lindorë ose shqiptarë. Nga bregdeti Tek nafta, kromi dhe pasuritë nëntokësore. Tek aeroportet, portet dhe rrugët kombëtare. Tek shëndetësia dhe arsimi. Çdo gjë është vënë nën kontroll nga një grusht klientësh të qeverisë”, shtoi Shehaj.
Ky model ekonomik sipas përfaqësuesit të PD, është ngritur nga Edi Rama për të kontrolluar të gjithë pushtetet në vend dhe pasojat e tij janë shkatërruese për vendin, në veçanti për rininë.
“Rezultati i kësaj katastrofe ekonomike Të Edi Ramës Është mungesa e mundësive ekonomike. Mos krijimi i vendeve të reja të punës, Papunësia dhe varfëria për qytetarët shqiptarë. Nga mungesa e mundësive Shqiptarët po largohen nga vendi, po ikën veçanërisht rinia , profesionistët, Mjekët, inxhinierët. Po ikin zanatçinjtë, Teknikët, elektricistët, marangozët. Ky shkretim i Shqipërisë nga njerëzit Po e thellon prapambetjen ekonomike dhe varfërinë e vendit” tha Agron Shehaj në fund të deklaratës së tij ku bëri thirrje edhe njëherë që sa më shumë qytetarë ti bashkohen nesër protestës së opozitës për rrëzimin e këtij sistemi. /Opinion.al
