Sot, më 1 Korrik, në ambientet e Gjykatës Kundër Korrupsionit dhe Krimit të Organizuar është zhvilluar seanca e pajtimit mes ish-kryebashkiakut të Burrelit, Agron Malaj dhe deputetit të Partisë Demokratike, Xhelal Mziu.
Ky i fundit është paditur për shpifje në Gjykatën e Posaçme nga ish-kryebashkiaku i Burrelit, Agron Malaj.
Padia ka lidhje me një deklaratë të bërë nga Mziu një ditë përpara zgjedhjeve parlamentare të 11 majit, ku ai akuzonte Malajn se kishte përdorur një automjet për shpërndarjen e parave në këmbim të votave.
Ngjarja që nxiti padinë ndodhi më 10 maj, kur simpatizantë të Partisë Demokratike ndaluan një automjet, duke pretenduar se personat brenda tij po shpërndanin para për të blerë vota në favor të PS-së.
Pas incidentit, Mziu, si drejtues politik i qarkut Dibër për PD-në, doli publikisht duke deklaruar se automjeti i përfshirë në ngjarje i përkiste kandidatit socialist, Agron Malaj.
Ish-kryebashkiaku i Burrelit ka mohuar çdo lidhje me pretendimet e bëra nga Mziu dhe i është drejtuar Gjykatës së Posaçme me një padi për shpifje, duke kërkuar që drejtësia të hetojë mbi deklaratat publike të deputetit demokrat.
Xhelal Mziu dhe Agron Malaj do të përballen edhe në legjislaturën e re të Kuvendit. Mziu ishte i pari në listën e Partisë Demokratike në Dibër. Malaj ishte i pari në listën e hapur të Partisë Socialiste në të njëjtin qark, duke marrë mbi 14 mijë vota./tvklan.al
