Kryetari i PAA, Agron Duka është i pakënaqur nga oferta që i ka bërë Lulzim Basha. Në një lidhje direkte në Ora News me gazetaren Ilva Tare, ai tha se kërkon nga PD, të paktën 7 mandate.
Duka tha se PD kërkon të maksimalizojë votat në zgjedhjet e 25 Qershorit, duke i vendosur të gjithë aletatët në listat e kandidatëve.
Ai theksoi se ende nuk është vendosur nëse PAA do të dalë apo jo e vetme në zgjedhje. Megjithatë strukturat e kërkojnë këtë gjë.
Nëse del i vetëm në zgjedhje, Duka tha se synon të marrë 3-4 mandate. Ndërsa nuk përjashtoi që pas 25 Qershorit, të ketë një koalicion edhe me PS.
“Normalisht kjo marrëveshje dëmton partitë e vogla. Dhe këtu nuk bëhet fjalë për LSI-në, e cila do të ketë gjithsesi numëruesit e saj. Madje unë mendoj se kjo marrëveshje e faktorizon votën e saj. Nuk di të them nëse do të dalim të vetëm në zgjedhje apo jo. Këtë do ta vendosim nesër. Por sinqerisht dua t’ju them se opinioni i bazës është të dalim më vete në zgjedhje. Emrin tim në listë vetëm nuk e pranoj sepse kjo do të thotë të fus në grackë të gjithë njerëzit që më kanë ndjekur. Nëse ne do të dalim më vete do të thotë se nëse nxjerrim 1-2 mandate, kemi mundësi të bëjmë koalicione. Pra padyshim nëse ne dalim të vetme në zgjedhje, dhe do të na kërkohet të koalicion me PS, padyshim. Nëse dalim nën logon e PD, jemi të detyruar të respektojmë pastaj këtë zgjedhje. Ne synojmë 3-4 mandate, Fier, Durrës, Tiranë dhe Shkodër. Nëse do të ishim në koalicion me PD do të synonim 7 mandate.” tha Duka.
