Lufta kundër krimit të organizuar dhe parave të akumuluara nga rrjetet kriminiale në vendin tonë, me mbështetje edhe të ndërkombëtarëve, pritet të nisë në mesin e muajt nëntor.
Lajmi është konfirmuar nga kryeministri Edi Rama ditën e sotme në seancën plenare, i cili tha se brenda muajit nëntor në Shqipëri do të vijnë agjentë të specializuar që do të punojnë ngushtësisht me Policinë e Shtetit, me Ministrinë e Brendshme, me Shërbimin Informativ dhe me të gjitha agjencitë e tjera me këtë punë.
Sipas tij, kreu i opozitës Lulzim Basha është në dijeni të këtij operacioni. Rama tha se ky operacion në vendin tonë do të prekë edhe sektorin bankar.
Nga ana tjetër, kryedemokrati Lulzim Basha theksoi se sektori bankar po depërtohet nga krimi, në kuptimin e financimit me fajde të parave të drogës dhe në kuptimin e angazhimit të bankave të caktuara në sektorin bankar në industrinë e pastrimit të parave të drogës.
Kryeministri Rama tregoi se operacioni është konsultuar nga ambasadori amerikan edhe me kryetarin e opozitës, për të marrë mbështetjen e saj.
“Ambasadori amerikan takon kryetarin e opozitës, i kërkon mbështetje për këtë operacion, kryetari i opozitës vjen këtu dhe siç e ka zakon, me fjalët e të huajve bën atë që e ka mësuar të bëjë lideri legjendar (Sali Berisha), që i përdor takimet me të huajt siç i do qejfi dhe bën atë paralajmërimin e famshëm: prit prit se javën tjetër do ta dëgjoni”, tha Rama.
Ambasadori Donald Lu pak ditë më parë foli shumë ashpër për mosvperim ndaj krimit të organizuar. “20 familje kriminale, katër klane kriminale! E thotë Departamenti i Shtetit. Ta ka thënë përpara dhe nëse kam një vërejtje për ambasadorin Lu është se e hapi gojën pas zgjedhjeve. Por, më mirë vonë se kurrë”, vijoi më tej Basha.
