Një 39-vjeçar i shpallur në kërkim për veprat penale “Vrasja në rrethana të tjera cilësuese”, kryer në bashkëpunim dhe “Armëmbajtja pa leje”, është arrestuar nga policia.
Në një njoftim për mediat autoritetet bëjnë me dije se Policia e Lezhës, në bashkëpunim me Forcën Speciale RENEA, mbi bazën e informacioneve të marra për vendndodhjen e një shtetasi shumë të kërkuar, me rrezikshmëri të lartë shoqërore, kanë finalizuar operacioni policor “Lalm i Ri”, si rezultat i të cilit është bërë e mundur kapja e Edmond Perdoda, 39 vjeç, banues në Lalm, Lezhë.
39-vjeçari ishte shpallur në kërkim, pasi Prokuroria e Rrethit Gjyqësor Lezhë ka lëshuar urdhër ndalimi, për veprat penale “Vrasja në rrethana të tjera cilësuese”, kryer në bashkëpunim dhe “Armëmbajtja pa leje”, sepse dyshohet që në bashkëpunim me vëllanë e tij, shtetasin Aleksandër Perdoda (i arrestuar me parë), kanë vrarë me armë zjarri shtetasit Kol Murrani dhe Preng Simoni.
Gjatë kontrollit të banesës së tij, shërbimet e Policisë gjetën dhe sekuestruan në cilësinë e provës materiale një armë zjarri kallashnikov, municion luftarak dhe një sasi baruti.
Materialet hetimore u referuan në Prokurorinë e Rrethit Gjyqësor Lezhë, për veprime të mëtejshme./Opinion.al
