Një 17-vjeçar është gjetur dje i masakruar në landfillin e përpunimit të mbeturinave në Sharrë.
Disa orë pas ngjarjes, viktima u identifikua me emrin Ardit Gjoklaj, 17 vjeç, nga Tropoja, banues në Tiranë. Kanë qenë punonjës të landfillit që, pas mesditës së djeshme, kanë njoftuar Policinë për gjetjen e një kufome në vendin ku po punonin. Shërbimet e rendit kanë shkuar menjëherë në vendin e ngjarjes dhe kanë nisur hetimet në lidhje me krimin.
Fillimisht, Policia bëri me dije se viktima kishte në trup veshje mushamaje si ajo që mbajnë punëtorët e landfillit. Po kështu, ai kishte në duar doreza plastike të njëjta me ato që mbajnë punëtorët e Sharrës gjatë kohës që punojnë në landfill. Këto detaje e bënë Policinë të dyshonte që në fillim te fakti se viktima mund të ishte punonjës i landfillit, ku edhe gjeti vdekjen.
Identifikimi i viktimës
Në orët e pasdites së djeshme, Policia e Tiranës deklaroi zyrtarisht se ka identifikuar kufomën e gjetur mesditën e së dielës në Sharrë. “Bëhet fjalë për shtetasin Ardit Gjoklaj, 17 vjeç, nga Tropoja, banues në Tiranë”, kanë thënë burimet zyrtare të Policisë. Sipas tyre, identifikimi i viktimës është bërë mbi bazën e dëshmive nga të afërmit e tij. Po kështu, Policia ka thënë se ekspertët e mjekësisë ligjore konfirmuan faktin se viktima nuk ka më shumë se 48 orë që ka humbur jetën.
Vrasje apo aksident
Dje gjatë gjithë pasdites efektivat e Policisë kanë bërë përpjekje për përcaktimin e pistës së ngjarjes, duke qenë të dyzuar mes një vrasjeje apo një aksidenti. Dyshimet e para dhe më kryesoret lidhen me një vrasje, pasi viktima, Ardit Gjoklaj, 17 vjeç, ka pasur një plagë në kokë, shenjë e dukshme goditjeje. Policia tha fillimisht se viktima mund të ishte vrarë duke u qëlluar me sëpatë në kokë. Por këqyrja e mëtejshme e kufomës evidentoi masakrimin e trupit të 17 vjeçarit, tek i cili u konstatuan prerje e copëtime edhe në pjesë të tjera të trupit e në gjymtyrë.
Pistat e Hetimit
Grupi i hetimit ka ngritur dje si pistë të parë atë të një vrasjeje të 17-vjeçarit nga persona ende të paidentifikuar. Për këtë arsye janë shoqëruar dje në Polici katër persona që punojnë në landfillin e Sharrës. Atje shpesh ka konflikte mes punonjësve në lidhje me parcelat e përpunimit të mbeturinave që mbërrijnë nga kryeqyteti. Në vazhdimësi konfliktet mes punonjësve janë shoqëruar edhe me konfrontime fizike, por pa arritur deri te vrasja, siç mendohet se ka ndodhur së fundi. Pista tjetër që po heton Policia ka të bëjë me një vrasje aksidentale, pasi dyshohet se gjatë orëve të mbrëmjes, makineritë e transportit apo përpunimit të mbeturinave mund ta kenë goditur viktimën dhe më pas e kanë zënë poshtë gjatë procesit të punës./ Panorama.al
