Janë zbuluar detaje të reja nga ngjarja e mbrëmshme në lagjen “1 Maji” në Kuçovë, ku si pasojë e të shtënave me armë mbeti i plagosur 46-vjeçari Admir Bejo.
Burime nga policia bëjnë me dije se nga vëzhgimi i kamerave të sigurisë së bizneseve dhe banesave që ndodheshin në rrugën kryesore të lagjes “1 Maji”, është bërë e mundur zbulimi i plotë i ngjarjes.
News 24 bën me dije se plagosja e Bejos nuk ka lidhje me larje hesapesh për ngjarjen e ndodhur në vitin 2007, kur ai dhe vëllai i tij Ilija Bejo plagosën me armë duke dalë nga hyrja e pallatit dy vëllezërit Kundja.
Ngjarja e mbrëmshme mësohet të ketë ndodhur për motive të dobëta, pas një konflikti të çastit të Admir Bejos me një banor tjetër të lagjes “1 Maji”, që banonte shumë pranë banesës së tij, pikërisht 200 metër nga vendi ku Bejo u gjet i shtrirë në rrugë.
Po ashtu policia konfirmon se konflikti mes Bejos dhe autorit ka ndodhur në banesën e këtij të fundit. Fillimisht ata kanë debatuar me njëri-tjetrin dhe më pas komshiu i tij ka nxjerrë pistoletën dhe ka qëlluar 2 herë mbi 46-vjeçarin Admir Bejo.
Ndërkohë, Bejo ka tentuar të ikë me vrap për të dalë nga banesa e autorit dhe në dalje është qëlluar edhe dy herë të tjera po plumbat nuk e kanë zënë.
Në pamundësi për të ecur për shkak të plagëve të marra, Bejo ka rënë në tokë pas disa metrash. Ai është gjetur i shtrirë nga një kalimtar që ka njoftuar policinë dhe është dërguar në spital.
Ndërkohë, bëhet me dije se autori i plagosjes, është identifikuar si shtetasi me inicialet E.R., 36 vjeç. Policia po punon për kapjen e tij, ndërkohë që emri i tij nuk është bërë publik ende.
Në vendngjarje janë gjetur 4 fishekë, të kalibrit 7.62 mm.
Burime nga lagjia “1 Maji” ku ishte edhe zona ku kishte lindur i plagosuri konfirmojnë se Admir Bejo ishte përdorues i rregullt i lëndëve narkotike dhe për këtë arsye mashtronte e u merrte lekë borxh njerëzve që njihte. Po ashtu, ishte një njeri që konfliktohej me këdo në lagje./Opinion.al
