Drejtoresha e përgjithshme e Tatimeve Vasilika Vjero nuk ka pranuar të zbatojë urdhrin e ministres së Financave Helga Vukaj për shkarkimin nga detyra të një punonjësi tatimor që u përfshi në fushatën e PS-së. Kjo shënon edhe përplasjen e parë të demokratëve dhe socialistëve tashmë në një Qeveri. Sipas marrëveshjes Rama-Basha ministrat teknikë kanë detyrë parësore të vëzhgojnë organizimin e zgjedhjeve dhe të marrin masa aty ku ka shkelje.
Kështu gjatë ditës së djeshme Helga Vukaj njoftoi disa media se ka urdhëruar shkarkimin e një punonjësi të administratës tatimore. Sipas njoftimit, Kliton Bistri u shkarkua për pjesëmarrje në një tubim elektoral të Partisë Socialiste, pasi u denoncua në “Facebook” nga ish-kryeministri Sali Berisha.
Por Kliton Bistri është ende në detyrë. Burime nga Drejtoria e Tatimeve thanë se urdhri i shkarkimit është i paligjshëm, pasi sipas ligjit punonjësit e administratës tatimore mund të shkarkohen vetëm nga Drejtori i Përgjithshëm i Tatimeve.
Sipas tyre, nëse ministrja ka prova për përfshirjen e punonjësve të administratës tatimore në veprimtari politike, atëherë ajo duhet t’ia paraqesë ato drejtoreshës së Tatimeve dhe është kjo e fundit që merr vendimin, në bazë të provave.
Duket se ky nuk do të jetë rasti i vetëm ku palët nuk do të gjejnë dakordësi, pasi fushata sapo ka nisur… Shpesh punonjës apo mjete të administratës i shohim rëndom në fushatën e partive që i kanë emëruar në punë.
