Fotografi Pirro Kasemi Beati dhe videografi Blerti Talelli kanë fuzionuar veçantitë e tyre krijuese, si artistë të fotografisë, dhe kanë krijuar video rrëfimin “Adea”, në kohëzgjatje prej vetëm 55 sekondash, për të prezantuar një anë tjetër të modeles së re Adea Mehmetaj – së fundmi e zgjedhur si trupi më i bukur në garën “Miss Universe Albania 2016”.
Si zhanër specifik, filmi super i shkurtër, në kohëzgjatje prej maksimum 60 sekondash, konsiderohet një nga sfidat më komplekse për secilin regjisor apo artist të fotografisë, ndërkaq Pirro dhe Blerti, në këtë krijim të tyrin, kanë arritur të krijojnë jo veç një video prezantuese për modelen e re (çuditërisht veç 17 vjeçare), por edhe të realizojnë me sukses një vijë funksionale narrative e cila shpërfaq një pjesë shumë interesante të karakterit të modeles Adea Mehmetaj, pra atë intime dhe sensuale. Duhet thënë se video krijime të tilla, që rëndom përcillen edhe me disa fotografi të zgjedhura, janë shumë të pranishme në botën e modës dhe të filmit në Perëndim, pasi që ato janë edhe një lloj “pasaporte” artistike për aktore dhe modele (jo vetëm) të reja, por që te ne ky zhanër nuk është eksploruar aq sa duhet.
Në një pjesë të mirë projekteve të saja të deritanishme, Adea na paraqitet si një modele që lë përshtypjen e dikujt që mëton të shpërfaq veten me nuanca serioze, por që këto nuk kanë shprehur karakterin e saj të vërtetë, si femër dhe as si modele e re që synon të përkufizojë veten si një artiste të modës. Një meditim më i thellë në sytë e saj, natyrisht nëpërmjet fotografive, tregon se Adea është një femër e ndrojtur, emocionalisht e ndjeshme dhe që në karakterin e saj si femër dhe si modele është natyrshëm sensuale, kualitete këto që deri tani nuk i kemi parë të shpërfaqen nëpërmjet punës së saj të deritanishme.
Si një shigjetare, plot vrull e pasion, por që është dukshëm e ndikuar nga karakteri ngulmues e emocional i një bricjapi (ka lindur me 20 Dhjetor) Adea ka druajtur se, përkundër përpjekjeve dhe punës së deritanishme, publiku shqiptar ende nuk e ka njohur prej së vërteti, prandaj edhe e ka ndjerë nevojën që të angazhohet në këtë projekt të Pirros dhe Blertit, ku sensualiteti i saj shpërfaqet nëpërmes dromcave të asaj që mund të cilësohet si natyrë ëndërrimtare e një femre që synon më shumë nga vetja. Blerti Talelli ka arritur ta lexoj mirë këtë pjesë të karakterit të saj femëror, prandaj bukurinë e Adeas dhe sensualitetin e saj pasionant ai e paraqet vetëm me anë të fytyrës dhe lojës me sytë e saj, gjithsesi një gjetje artistike mjaft e qëlluar.
Krahas videos, projekti “Adea” vjen edhe me tre fotografi të zgjedhura të realizuara nga Pirro Kasemi Beati ku ai përpiqet të paraqesë anën më pak të dukshme të karakterit dhe bukurisë së secilit, që rëndom është edhe pjesa që më shumti ngacmon imagjinatën njerëzore./Ekspress
