Shërbimi për Çështjet e Brendshme dhe Ankesat ka goditur një rast të përfitimit nga ndihmat për banorët e dëmtuar nga tërmeti.
Mësohet se janë arrestuar 2 punonjës policie, 1 punonjës të Shërbimit Zjarrfikës, si edhe janë proceduar penalisht 2 shtetase për veprat penale të “Mashtrimit” dhe “Shpërdorimit të detyrës”.
Konkretisht është arrestuar detyre Shefi i Seksionit të Rendit pranë Komisariatit të Policisë Rinas, një komandant skuadre në Seksionin e Rendit pranë Komisariatit të Policisë Rinas dhe një punonjës i shërbimit zjarrfikës pranë PMNZSH Kombinat.
Procedimi i tyre u krye pas hetimeve të zhvilluara në lidhje me publikimin e një video në media, ku shfaqeshin pamje të transportimit e përvetësimit të një sasie të konsiderueshme pakosh ushqimore (të sekuestruara në cilësinë e provës materiale) të destinuara për banorët e prekur nga situata e tërmetit.
Materialet hetimore procedurale do t’i dërgohen Prokurorisë Tiranë për hetime të mëtejshme.
SHÇBA fton çdo qytetar të denoncojë në numrin jeshil 0800 90 00, për çdo rast abuzimi të punonjësve të Policisë së Shtetit, duke garantuar reagim të shpejtë e në kohë. /Opinion.al
