Tashmë qytetarët shqiptarë do të mund të raportojnë problemet në shërbimet konsullore online nëpërmjet një aplikacioni. Lajmin e bëri të ditur në ministri i Jashtëm në detyrë, Gent Cakaj. Nëpërmjet një postimi në Facebook, ai i ka kërkuar shqiptarëve të raportojnë çdo problem që mund të hasin gjatë shërbimeve konsullore në aplikacionin Ambasada Ime.
“Pasi të shkarkoni aplikacionin Ambasada Ime, me nje një klik zgjidhni rubrikën “Raporto”. Pas hapjes së rubrikës, vendosni të dhënat tuaja (emër, mbiemër, email dhe numër kontakti) për të evidentuar rastin në fjalë dhe lehtësuar komunikimin e përbashkët. Pasi të keni bërë zgjedhjen e vendndodhjes dhe shërbimit që keni marrë, në hapësirën “raporimi juaj” paraqisni hollësisht shqetësimet tuaja dhe raportoni drejtpërdrejtë për probleme të çfarëdolloj natyre”, shkruan Cakaj.
Ministri në detyrë thekson se të gjitha raportimet do të shqyrtohen nga nivelet drejtuese të ministrisë për të garantuar një shërbim sa më llogaridhënës.
“Rubrika e re “Raporto” garanton tashmë që shqetësimet tuaja të përcillen drejtpërdrejtë në të gjitha nivelet drejtuese në Ministrinë për Evropën dhe Punët e Jashtme. Le të përpiqemi sëbashku për një shërbim sa më llogaridhënës, funksional dhe dinjitoz”, mbyllet postimi i Gent Cakajt. /Opinion.al
