Masat e ndërmarra nga Bashkia e Tiranës për të disiplinuar transportin urban nuk kanë dhënë efektin e duhur.
Këtë e pranoi edhe kryebashkiaku Erion Veliaj gjatë mbledhjes së Këshillit, në përgjigje të shqetësimeve të ngritura nga këshilltarët e LSI-së për mungesën e aboneve të studentit në treg.
“Me fushata, me gjoba, pavarësisht se jemi përpjekur me AMK, sapo mbaron java e disiplinimit, fillon prapë e njëjta histori. Pavarësisht se agjencia e mbrojtjes së konsumatorit ka vënë pa fund gjoba, kam zbuluar se nuk është problemi te numri i aboneve që printon çdo muaj, por te fakti se meqë aty nuk iu leverdis dhe nuk preferojnë t’i shesin. Gënjejnë, thonë që janë mbaruar, s’janë printuar, ndërkohë që e vërteta është krejt ndryshe. Refuzojnë t’i shesin pasi duan të maksimizojnë fitimin”, raporton panorama.
I gjendur në këtë situatë, Veliaj bëri publike dy propozimet që do t’i çojë Këshillit Bashkiak për votim.
“Së pari, shpërndarja e abonesë duhet të kalojë nga kompanitë e licencuara te Bashkia e Tiranës. Nëse Bashkia e merr shitjen e abonesë, mund ta kontrollojmë të plotë. Propozimi i dytë që shumë shpejt do t’ju bëj është për krijimin e një agjencie publike të transportit”, tha kryetari.
Veliaj bëri përgjegjës paraardhësin e tij për situatën në të cilën ndodhet sot transporti publik, pas privatizimit të të gjitha linjave.
“Administrata e mëparshme i privatizoi të gjithë linjat, duke mos na lënë të paktën një që të ishim faktorë në treg, sot ne jemi në një situatë ku mund të kidnapohemi në çdo moment, siç ndodhi në janar”.
