Është zhvilluar ditën e sotme në Gjakovë ceremonia e përurimit të abetares së përbashkët Shqipëri-Kosovë, ku të pranishëm ishin kryeministri i Kosovës, Albin Kurti, ministrja e Arsimit e Kosovës, Arbërie Nagavci por edhe ministrja e Arsimit të Shqipërisë, Evis Kushi.
Gjatë fjalës së saj Kushi tha se shume njerëz kanë qenë skeptike për këtë nismë, por që ia dolën ta realizojnë.
Ndër të tjera ajo theksoi se kjo abetare do të fshijë kufijtë mes dy vendeve.
“Shumë njerëz ishin skeptike, që ne do ta realizonim këtë nismë. Jo thjesht një abetare të re, por një abetare cilësore dhe që reflekton të gjitha shqetësimet. Kur ka bashkëpunim asgjë nuk është e pamundur. Kjo abetare do të fshijë kufijtë mes Shqipërisë dhe Kosovës. Ky është libri që do ta na bashkojë më shumë dhe forcojë më shumë dashurinë për njëri-tjetrin. Jemi një komb dhe kemi një gjuhë. Edhe Faik Konica ka thënë e vetmja lidhje që i ka mbajtur të lidhur shqiptarët ka qenë gjuha shqipe. Për ne nuk ka krenari më të madhe sesa gjuha shqipe. Sa shumë histori me shkronjat shqipe. Ne kemi organizuar një ekspozitë me të gjitha abetaret, më shumë se 100 abetare. Unë jam krenare që gjuha shqipe mësohet jo vetëm në Shqipëri dhe Kosovë, por edhe në Universitetet më prestigjioze në botë. Së fundmi gjuha shqipe do të mësohet në Universitetin e Harvardit”, tha Kushi.
