Aleanca për Ardhmërinë e Kosovës kërkon rinumërim të të gjitha votave të monitoruara nga hetues vendës. Gjatë mbledhjes së kryesisë AAK-ja ka vlerësuar se nuk duhet që ti faturohen të gjitha keqpërdorimet vetëm kësaj partie.
“Kërkojmë rinumërim të plotë të votave në prezencë të hetuesisë që të gjendet e vërteta. Ndërtimi i institucioneve duhet të ndodhë sa më shpejtë. Ne nuk e kontestojmë rezultatin, përqindjen tonë ose të LVV-së, LDK-së apo PDK-së nuk shoh arsye pse dikush duhet të dalë kundër rinumërimit përpos nëse fshehin keqpërdorime të tjera që nuk i njeh opinion”.
Kreu i AAK-së Ramush Haradinaj kërkon që kriminelët të kenë vendin në burg.
“Edhe ne jemi të shqetësuar për keqpërdorimet që kanë ndodhur në disa raste nga disa komisionerë ose vëzhgues të pandërgjegjshëm dhe kërkojmë nga organet e rendit që kriminelët e votës të përfundojnë në burg”.
Për shkak të dyshimeve për manipulim votash, ditë më parë Meliza Haradinaj Stublla ka dhënë dorëheqje nga posti i ministres në detyrë dhe të gjitha funksionet në AAK. Lidhur me këto dyshime tashmë janë arrestuar dy komisionerë.
