Arabia Saudite ka mohuar lajmet se princi i kurorës, Mohammed bin Salman është përgjegjës për përgjimin e telefonit të pronarit të kompanisë Amazon, Jeff Bezos.
Ambasada saudite në Shtetet e Bashkuara ka thënë se këto pretendime “janë absurde” dhe u ka bërë thirrje autoriteteve për t’i hetuar ato.
Më herët është thënë se ky sulm ka qenë i lidhur me vrasjen e gazetarit të “Washington Post” Jamal Khashoggi në konsullatën saudite në Stamboll, pasi gazeta ku ai punonte është në pronësi të Bezos.
Sipas gazetës britanike Guardian, telefoni i Bezosit është hakuar pasi ka pranuar një mesazh në aplikacionin WhatsApp, i dërguar nga llogaria personale e Salmanit, ndërsa The Financial Times ka raportuar se pas marrjes së mesazhit, telefoni i miliarderit ka nisur të shpërndajë në mënyrë sekrete një sasi të madhe të informacionit.
Kjo nuk është hera e parë që mbretëria saudite është akuzuar për hakimin e telefonit të Bezosit. Në mars të vitit të kaluar një hetues bëri me dije se Arabia Saudite ka qenë mbrapa një sulmi të ngjashëm, për të fituar qasje në të dhënat e njeriut më të pasur në botë./Opinion.al
