Teksa shprehet i bindur për fitoren e socialistëve në Elbasan, Damian Gjiknuri, Sekretari i Përgjithshëm i Partisë Socialiste, thotë se aktualisht situata në këtë qytetet është e qetë.
Ai theksoi se PS është e kujdesshme që të mos përsëriten ngjarje të rënda si më 21 prill 2021, ku mbeti i vdekur Pjerin Xhuvani.
Gjatë një interviste për “ABC”, Gjiknuri tha se nëse opozita do të organizojë sërish grupe të ashtuquajtura të mbrojtjes së votës, shteti ligjor do të veprojë dhe nuk do të tolerojë.
“Ka vite që Elbasani nuk ka ndonjë ngjarje për t’u theksuar. Natyrshëm që ka ndonjë ngjarje kriminale si kudo tjetër, por mendon se situata është shumë më e qetë, nuk besoj që do të kemi më ato situata të përsëritura të vitit 2021. Nuk besoj që opozita e foltores do të organizojë prapë grupe të ashtuquajtura të mbrojtjes së votës që do të provokojnë tensione në qytet. Nuk e besoj. Nëse do të jetë kjo, natyrshëm që shteti ligjor do të veprojë dhe nuk do të tolerojë më fenomene të tilla”, tha Gjiknuri.
