Edhe pse dialogu Kosovë-Serbi ka ngecur që nga vjeshta e vitit 2018, një marrëveshje për linjën ajrore Prishtinë-Beograd është nënshkruar ditë më parë në ambasadën amerikane në Berlin, me iniciativë të Shteteve të Bashkuara të Amerikës.
Kjo në një formë po shihet si rifillim i bisedimeve mes dy shteteve.
Pas fushatës së ashpër lobuese kundër Kosovës në diplomacinë e jashtme, të zhvilluar vazhdimisht nga Serbia, në nëntor të vitit 2018, Qeveria e Kosovës e drejtuar nga Ramush Haradinaj i vendosën taksë 100% mallrave serbe.
Që nga ajo kohë janë ndërprerë bisedimet, pasi Serbia ka deklaruar se nuk e vazhdon dialogun derisa taksa mbetet në fuqi. Por një ndërhyrje amerikane, bëri që të nënshkruhet një marrëveshje për linjën ajrore Prishtinë-Beograd, e që po shihet sinjal për rifillim të dialogut.
Analisti Rasim Alija në një deklaratë për KosovaPress, këtë e sheh si mundësi për rifillim të dialogut, veçse problematike e konsideron çështjen e formimit të Qeverisë së re të Kosovës.
Edhe Eugen Cakolli nga Instituti Demokratik i Kosovës thotë për KosovaPress, se dialogu me Serbinë praktikisht ka rifilluar.
Sipas tij, kushtet për rifillim të dialogut veç janë krijuar. Ai shton se formimi i institucioneve të Kosovës është tejet i rëndësishëm për procesin e dialogut Kosovë-Serbi./ Opinion.al
