Monika Kryemadhi (6 Mars 2019): Zgjedhjet lokale do të shtyhen për në Shtator-Tetor. Asnjë kryebashkiak nuk do të pranonte të hynte në zgjedhje të tilla në këtë situatë, sepse do ta kishin të pamundur.
Teksa afati i fundit që opozita të dorëzojë në KQZ, listën e kandidatëve për anëtarë dhe sekretarë të KZAZ-ve për zgjedhjet e pushtetit vendor, është ora 24:00 duket se opozita do të bojkotojë këto zgjedhje. Nisur dhe nga deklarata e kryetares së LSI, bërë në “Opinion”.
Dhe historia ka treguar se shtyrja e zgjedhjeve në Shqipëri, nuk është një risi. Pa përmendur vitin 2017 ka dhe precedentë të tjerë për shtyrjen e zgjedhjeve.
Në 10 shkurt 1991 në Shqipëri ishin dekretuar zgjedhjet e përgjithshme. Por në Dhjetor 1990, protestat e studentëve çuan në krijimin e Partisë Demokratike, partisë së parë të opozitës. Nga 10 Shkurti 1991 ato u shtynë në 31 Mars 1991 kur edhe u mbajtën realisht.
Shtyrja e dytë e zgjedhjeve ndodhi në Dhjetor 2006, kur zgjedhjet lokale, u shtynë sërish pas një marrëveshje mes partive politike në Presidencë dhe u mbajtën në Shkurt 2007.
Edhe bojkoti i zgjedhjeve ka ndodhur në Shqipëri. Ishte 26 maji i 1996, që rezultoi fatal për vendin. PS, PSD, PAD në atë kohë vendosën të bojkotojnë zgjedhjet dhe PD fitoi thuajse në të gjitha zonat, duke humbur vetëm 5 nga thuajse 115 zona elektorale.
Kryeministri Edi Rama ka thënë se zgjedhjet lokale do të mbahen pavarësisht nëse merr pjesë opozita, apo jo. Madje sipas Ramës, PS do t’i fitojë të gjitha bashkitë./Opinion.al
