Gjykata e Apelit la sot në fuqi vendimin e Shkallës së Parë, duke vendosur përfundimisht pushimin e çështjes ndaj Lulzim Bashës dhe dy zyrtarëve të tjerë të PD-së, Arben Ristani dhe Ilir Dervishi lidhur me financimin rus për lobimin në Shtete e Bashkuara të Amerikës.
Megjithatë, kreu i Grupit Parlamentar të Partisë Socialiste, Taulant Balla, thotë se vendimi i sotëm i Apelit nuk i ka dhënë pafajësi liderit të PD, por thjesht ka vonuar drejtësinë.
Në një postim në Facebook Balla ka publikuar disa dokumente të cilat sipas tij shërbejnë si prova që duhen hetuar. Madje kësaj here Balla ka paralajmëruar se do të paraqesë kallëzim penal në SPAK ndaj kreut të demokratëve.
Por a mund ta çojë kreu i grupit parlamentar socialist në Prokurorinë e Posaçme për Korrupsionin dhe Krimin e Organizuar këtë çështje?
Duke rikujtuar se në fillim akuzat ndaj Bashës ishin ato të pastrimit të parave dhe falsifikim të dokumenteve, sjellim në vëmendje se akuza e parë u rrëzua nga prokuroria që në nëntor të vitit të shkuar. Në gjykatë u çua vetëm akuza e falsifikimit, e cila deri tani është rrëzuar dy herë. Në rastin e sotëm me vendim të formës së prerë në apel.
Juristi Jordan Daci i pyetur nga Opinion.al shprehet se SPAK nuk mund ta rihapë më këtë çështje dhe se ajo është jashtë kompetencave të tij.
“Një çështje e gjykuar me vendim të formës së prerë siç është vendimi i apelit, nuk mund të rihapet më nga asnjë prokurori përfshirë dhe SPAK, aq më pak që vepra për të cilën është dyshuar Basha nuk është kompetencë.”- është shprehur juristi Daci ./Opinion.al
