Sot është Dita Ndërkombëtare e Infermierëve. Në Shqipëri prej disa vitesh ky profesion është kthyer në një pasaportë për të emigruar drejt Europës, kryesisht në Gjermani.
Sipas të dhënave nga zyra gjermane e statistikave në vitin 2016 kanë emigruar 87 infermierë shqiptarë, në 2017-tën kanë emigruar 735 infermierë dhe në 2018-tën kanë emigruar 1,242 infermierë.
Gjatë vitit 2018 sipas të dhënave zyrtare të Urdhrit të Infermierit kanë kërkuar certifikatën e sjelljes 909 profesionistë të licencuar, ndërkohë që vetëm në 9 muajt e parë të vitit 2019 ishin 362 persona më shumë.
Eksodi i madh i infermierëve është dhe pothuajse sa numri i studentëve që diplomohen gjatë një viti në Fakultetet e Shkencave Mjekësore Teknike.
Pamjet e ambasadës gjermanë ku dynden që prej orëve të para të mëngjesit qindra mjekë dhe infermierë të cilët presin vizën e punës për t’iu drejtuar Evropës, janë bërë normale.
Kushtet e punës dhe jetesa më e mirë mbeten dy arsyet kryesore për të blerë biletën vetëm vajtje në Gjermani.
Gjatë krizës së koronavirusit, infermierët morën vëmendjen kryesore duke u quajtur heronj të vijës së parë të rrezikut. Disa prej tyre shkuan edhe si mision solidariteti në Itali çka e bëri Shqipërinë për disa ditë të shfaqej në faqet e para të gazetave botërore.
Sot në ditën e tyre ndëkombëtare politika ka shprehur mesazhe mirënjohjeje duke shkruar se sakrefica i ka bërë heronj. Por a mjafton vetëm mirënjohja për infermierët sot?/Opinion.al
