Ditën e sotme qarkulluan zëra se Senati Akademik i Universitetit të Tiranës, kishte kërkuar shkarkimin nga detyra të Rektorit të këtij Universiteti, Mynur Koni.
Ky lajm është përgenjështruar nga Dekani I Fakultetit Ekonomik, Dhori Kule.
Në një prononcim për mediat, Kule sqaroi se në këtë mbledhje u miratua ngritja e grupit të punës për paktin për Universitetin, të sjellë nga qeveria.
Kule ka informuar edhe për një episod, kur Dekani i Fakultetit Juridik, Artan Hoxha, ka kërkuar që një grup studentësh që duan të bëjnë mësim, janë futur në mbledhjen e senatit.
“E kërkuan studentët që erdhën. Senati Akademik nuk u mor fare me dorëheqjen e Konit sepse ka një procedurë ligjore. Nuk ka qenë qëndrim i senatit problemi i Mynyr Konit. U mblodh për një problem të madh të universitetit dhe miratoi qëndrimin e grupit të punës”, u shpreh Kule
Më tej dekani Kule informoi se shumicën e akteve që qeveria ka sjellë në paketën e Paktit për Universitetin, anëtarët e senatit I kanë quajtur të paligjshme.
“Senati nuk u mblodh as për të hequr Mynyr Konin as për të diskutuar për të. Sot senati u mblodh për të analizuar detyrën që i kishte dhënë në mbledhjen e datës 14, grupit të punës për të verifikuar aktet që kanë dalë në lidhje me paktin për universitetin dhe grupi i punës kishte përgatitur një material, i cili u miratua nga senati.
Pra, për shumë nga ato akte grupi i punës thoshte se janë të paligjshme, antikushtetuese. Gjithë relacionin që bëri grupi i punës, senati e miratoi. Por senati tha të shohim edhe elementë të tjerë të akteve që kanë dalë dhe pas një jave grupi i punës të shprehet dhe për ato akte që nuk janë parë.
Ne i kërkuam të shohin dhe njëherë nëse kanë probleme. Për shumicën e akteve grupi i punës tha se duhen anuluar, janë të paligjshme”, deklaroi Kule .
Sipas dekanit Kule, grupi i punës do të mblidhet sërish për të shqyrtuar disa akte të tjera që lidhen me Paktin e Universitetit.
“Por u tha të plotësohet për aktet që nuk ishin shprehur. Senati kërkoi që pas një jave të mblidhet sërish për një raport përfundimtar. Ata ishin shprehur për 5-6 VKM dhe thoshin se janë të paligjshme, antikushtetuese.
Fryma e senatit ishte që VKM-të e paktit që janë të pakonsultuara dhe të paanalizuara nga grupi i punës të rishikohen. Senati miratoi me unanimitet raportin e grupit të punës”, tha dekani Kule.
