Gjatë samitit të Brdo – Brijunit, ku ishin liderët e Ballkanit Perëndimor, në tryezën e diskutimit me dyer të mbyllura nuk ka patur debat mes presidentit të Serbisë dhe atij të Kosovës. Siç mësohet, dy presidentët kanë shprehur qëndrimin e tyre sipas radhës.
Sipas burimeve, presidenti kosovar është shprehur se “ne jemi për vijimin e dialogut por askush nuk mund të na vërë kushte”. Ndërkohë në konferencën për shtyp pas takimit, detaje ka dhënë dhe presidenti Ilir Meta.
“Nuk di të them nëse ky samit ka afruar më tepër dy liderët Kosovë-Serbi. Iu siguroj që atmosfera ka qenë mjaft pozitive, konstruktive. Arritja e marrëveshjes së Prespës është historike për të zgjidhur një mosmarrëveshje 30 vjeçare, të gjithë do donim që dhe dialogu Serbi-Kosovë të përfundonte në këtë mënyrë. Ajo që është pozitive është angazhimi për paqen dhe perspektivën evropiane dhe vullneti për zgjidhjen e çështjeve me dialog”, theksoi kreu i shtetit.
Presidenti Meta po ashtu pati dhe një përgjigje pas kritikave të Hashim Thaçit, për ftesën ndaj Milorad Dokik, anëtarin serb të presidencës së Bosnje-Hercegovinës.
“Samiti ka një format të përcaktuar, dhe si të gjithë krerët e vendeve anëtare dhe ai ka qenë i ftuar dhe i mirëseardhur. Ka mbetur mjaft i kënaqur, ka treguar se do të dijë për turizmin pasi kishte dëgjuar fjalë të mira nga qytetarë të e vendit të tij”, tha Meta.
“Pas zgjedhjeve europiane, procesi i zgjerimit nuk do të jetë më i njëjtë”
Presidenti i Sllovenisë, Borut Pahor, paralajmëroi vendet e Ballkanit perëndimor që të nxitojnë në realizimin e detyrave, në mënyrë që procesi i anëtarësimit në Bashkimin Europian të mos vonohet, sidomos duke pasur parasysh zgjedhjet e ardhshme në Parlamentin Europian, nga ku do të dalë edhe Komisioni i ri Europian.
“Nuk mund të them se i zgjidhëm problemet, por kemi debatuar çështjet në mënyrë shumë miqësorë. Kjo vjen për shkak të faktit se të gjithë e dinë që pas zgjedhjeve të Parlamentit Europian, procesi i zgjerimit nuk do të jetë në nivelin e lartë të rendit të ditës. Prandaj është në dorën tonë që të ndërmarrim hapat në mënyrë që ku rajon të jetë më tërheqës për Bashkimin Europian”, tha Pahor. Megjithatë ai shtoi se edhe Bashkimi Europian duhet të ketë një tjetër qasje ndaj këtij rajoni. “Pas zgjedhjes së Komisionin e ri do të ketë ardhur koha që Brukseli ta shohë ndryshe procesin e zgjerimit drejt Ballkanit perëndimor”, shtoi ai.
Presidenti i Polonisë: BE duhet t’i mbajë dyert e hapura për anëtarësim
Presidenti i Polonisë, Andrzej Duda tha sot se Bashkimi Europian duhet t’i mbajë dyert e hapura për anëtarësimin e Ballkanit dhe të gjej programe e instrumente që e mbështesin këtë gjë. Ndërkohë, presidenti i Polonisë foli për situatën në Ballkan duke theksuar faktin se mes vendeve fqinje duhet të ketë dialog, referuar këtu Kosovës dhe Serbisë.
“Historia e këtyre tokave është mjaft e vështirë. Për mua kjo është diçka e ndryshme me atë që përballemi në Poloni. Këto dukuri në vendin tim kanë ndodhur në Luftën e II Botërore, por këto çështje tani mund të diskutohen me qetësi dhe nuk ka më mërira. Këto çështje duhet të diskutohen dhe zgjidhen nëpërmjet dialogut mes liderëve dhe drejt rrugës së tyre në BE. Kjo është një detyrë e madhe e Brukselit dhe vendeve anëtare të BE që ta kuptojë këtë proces dhe ta mbështesin. Ky është një rol i madh që luhet nga dy vendet. Europa Juglindore ka nevojë për Evropën dhe anasjelltas. BE duhet t’i mbajë dyert e hapura për anëtarësim, të gjej programe dhe instrumente që e mbështesin këtë gjë”, tha presidenti i Polonisë. / Opinion.al
