Deri më tani, nuk ka pasur kurrë kufizime që prekin 100% të destinacioneve globale. Njësoj si shumë sektorë të ekonomisë globale, industria e turizmit po përjeton ndryshime të mëdha.
Sipas një raporti, të lëshuar së fundmi, nga Organizata Botërore e Turizmit, agjensia e Kombeve të Bashkuara për turizëm ka deklaruar që çdo vend në hartën globale të turizmit, ka miratuar kufizime dhe masa udhëtimi për shkak të COVID-19.
Të dhënat e fundit nga agjensia e OKB tregojnë se 100% e destinacioneve tani kanë kufizime totale ose të pjesshme, ndërsa 83% i kanë mirëmbajtur ato për katër ose më shumë javë deri më sot dhe asnjë vend i vetëm nuk i ka hequr ato ende.
‘Pandemia COVID-19 ka nxitur të gjitha destinacionet, në të gjithë botën për të vendosur kufizime në udhëtime’, thuhet në raport.
‘90 destinacione kanë mbyllur plotësisht ose pjesërisht kufijtë e tyre për turistët, ndërsa 44 të tjera janë të mbyllura për disa turistë në varësi të vendit nga vijnë.’
Duke gjurmuar kufizimet, sipas kohës që janë vënë në praktikë dhe ashpërsisë së tyre, në çdo rajon të globit dhe evolucioni i tyre që nga janari, është bërë një studim, që tregon se nga 217 destinacione në të gjithë botën:
45% i kanë mbyllur plotësisht ose pjesërisht kufijtë e tyre për turistët, 30% kanë pezulluar plotësisht ose pjesërisht fluturime ndërkombëtare, 18% ndalojnë hyrjen për pasagjerë nga vendet specifike të origjinës ose pasagjerët që kanë qënë tranzit në destinacione me rrezik të lartë. Kurse 7% janë duke aplikuar masa të ndryshme, të tilla si karantinë ose izolim për 14 ditë dhe masa për viza.
Ndër sektorët kryesorë ekonomikë në botë, turizmi përbën 10% të punëve në nivel global dhe është një nga më të prekurit nga pandemia dhe përballet me një rënie të vlerësuar në rreth 30%, me një humbje deri në 450 miliardë dollarë./Opinion.al
