Nga Blendi Fevziu –
Një mbrëmje rutinë në klubin e fshatit desh u kthye dje në tragjedi në Berogozhdë të Pogradecit. Shpërthimi i një bombole gazi u shndrua në një ngjarje dramatike, ku kanë mbetur të plagosur mbi 30 vetë disa disa në gjendje të rëndë. Skenat e të plagosurve që mbërrinin në spitalin e Tiranës u transmetuan thuajse live në opinion.al dhe imazhet ishin më shumë se tronditëse. Rastësia dhe zoti e shpëtuan fshatin dhe Shqipërinë nga një tragjedi që do kishte lënë gjurmë të thella.
Shkaku është identifikuar tashmë. Një bombol gazi shpërtheu nga pakujdesia dhe mbi të gjitha nga mungesa e të gjitha parametrave të sigurisë. Parametra që janë të detyruar me ligj dhe që nuk zbatohen kurrë.
Ndërsa po shkruaj këtë editorial, një zjarr ka përfshirë një ndërtesë në Unazën e re dhe sipas njoftimeve ende nuk dihet nëse mes zjarrit kanë mbetur persona të asfiksuar. Flitet për një fëmijë. Dhëntë zoti që lajmi të mos jetë i vërtetë. Ajo që dihet është sërish se zjarri ka ardhur nga një shpërthim gazi që me gjasë, sërish ka qenë jashtë parametrave teknikë.
Pak muaj më parë një tjetër bombol gazi shpërtheu në një ëmbëltore në rrugën Don Bosko duke plagosur disa vetë, madje edhe kalimtarë të rastësishëm aty. Bombola sipas policisë ishte jashtë parametrave teknikë dhe i mungonte siguria e nevojshme në raste si këto.
Në dy rastet e para policia arrestoi pronarët e lokaleve, me plot të drejtë, por deri më sot, nuk ka asnjë njoftim nëse janë arrestuar edhe pronarët e kompanive që i furnizojnë ata me gaz?! Ka një rregull se si liçensohen kompani të tilla; ka rregulla sigurie të standarteve europiane që duhet të zbatohen, ndërkohë që ligji e ndalon thuajse krejt përdorimin e gazit në vende me rrezikshmëri të lartë dhe në lokale që kanë mbi to banesa.
Për fatin e keq, një vëzhgim mediatik i shfaqur disa muaj më parë, rrefeu se asnjë masë sigurie nuk zbatohet. Shqipëria, duke nisur madje që nga Tirana, jeton mbi bomba masive që mund të shpërthejnë çdo sekondë. Kompanitë që shpërndajnë gaz janë në shumë raste pa liçensë ose pa asnjë masë sigurie. Askush nuk i gjobit sepse me gjasë paguajnë shuma të mëdha pikërisht për të shmangur ndëshkimin. Nuk i zbatojnë standartet e sigurisë sepse kështu kanë kosto më të ulta dhe vënë në rrezik jetën e gjithsecilit prej nesh.
E njëjta situatë me rrezikun e zjarrit dhe me masat e sigurisë që thuajse nuk ekzistojnë. Shumica e klubeve dhe restoranteve të Tiranës nuk kanë as dalje sigurie dhe asnjë standart për t’i ruajtur nga zjarri. Sipas një vëzhgimi po televiziv afro 87 % e lokaleve në qendër të qytetit nuk dalje emergjence që është e detyrueshme për frekuentime masive. Kur nuk ka në Tiranë, imagjinoni se çfarë ndodh nëpër Shqipëri. Për pak fitime më shumë janë gati të rrezikojnë mijëra jetë. Dhe për fat të keq, shteti bën sehir. Janë dënuar jo pak vetë sepse nuk paguajnë energjinë, po nuk është dënuar askush që rrezikon jetën e dhjetra të tjerëve, qytetarë të pafajshëm duke mos zbatuar ligjet e sigurisë.
Siguria e qytetarëve nuk blihet me para, qofshin edhe para të monopoleve apo bizneseve që më së shumti financojnë politikën!
Blendi Fevziu
