A ishte Saimir Tahiri shkaktari i largimit të kreut të SHISH dhe vendimit të tij për dorëheqje? Në fakt opozita nxitoi ta bënte një deklaratë të tillë, ku vetë kreu i demokratëve Lulzim Basha e cilësoi si një presion politik që synon të fshehë aferën e Tahirit.
Deputeti Sali Berisha ka shkuar edhe më tej kur akuzon për narkotrafik edhe vëllain e Kryeministrit, ndërsa kërkon në mënyrë urgjente publikimin e Mbledhjes së Keshillit te Sigurisë Kombëtare, një kërkesë e ish-Presidentit Nishani, të cilën Berisha e konsideron jetike.
Por në një kohë, kur emri i Ajazit dukej se ishte konfirmuar për një mandat të dytë lind pyetja, përse në mënyrë të befasishme ai jep dorëheqjen? Burime për Opinion.al, thonë se këtë vendim Ajazi e ka marrë që të premten dhe e ka paraqitur tek presidenti Meta.
Ndërkohë as burimet nga Kryeministria dhe as ato nga Presidenca nuk japin arsyet e kësaj dorëheqjeje, që në fakt lë vend për shumë pikëpyetje, e ardhur në një moment si ky, kur njëri nga ish-ministrat e qeverisë Rama 1, akuzohet për përfshirje në trafikun ndërkombëtar të drogës.
Çfarë di shefi i SHISH për këtë çështje dhe si funksionojnë raportet e tij me shërbimet e vendeve fqinje të cilat kanë përgjuar Habilajt?
A do të ishin shërbimet sekrete një pikë e fortë në hetimet e Prokurorisë ndaj ish-ministrit Tahiri? A është kjo një lëvizje e Kryeministrit për ta kontrolluar situatën? Cili do të jetë roli i presidentit në gjithë këto pikëpyetje? /Opinion.al
