Ditën e sotme u njoftua dhe arrestimi i personit të pestë, që dyshohet si i përfshirë në grabitjen e ndodhur pak ditë më parë të aeroportit të Rinasit.
Elton Pikli, ra në prangat e policisë teksa po përpiqej të largohej drejtë Bullgarisë. Mësohet se 32-vjeçari ka pasur një rol të rëndësishëm gjatë grabitjes së parave, pasi dyshohet se ai ka qenë i pranishëm dhe i armatosur gjatë kohës që po merrnin paratë nga barku i avionit.
Gjatë grabitjes mbeti i vrarë Admir Murataj, i cili u qëllua në kokë pas shkëmbimit të zjarrit me forcat e policisë.
Vrasja e Muratajt, bëri të mundur dhe identifikimin e autorëve të tjerë të dyshuar, ndërsa një nga pikat kyçe për hetimin ishin dhe shenjat e gishtrinjëve që u gjetën në furgonin e modifikuar me mbishkrimin “hetimi tatimor”.
Po ashtu, në pranga kanë rënë deri më tani Oltian Veseli, Alkon Bengasi, Renaldo Sula dhe Saimir Çela. Policia e Shtetit dhe prokuroria arritën që të zbulojë autorët falë dëshmisë së Alkond Bengasit, kushëririt të Klement Çalës, një nga të shpallurit në kërkim për grabitjen e fundit në aeroport dhe të tjera vite më parë.
Oltian Veseli, dyshohet të jetë një nga pesë personat që u futën me furgon në pistën e aeroportit të Rinasit, duke vjedhur miliona euro të bankave të nivelit të dytë teksa do të transportoheshin me avionë në Vjenë./Opinion.al E.Xh.
