Një studim i Universitetit të Oksfordit, i publikuar nga BBC, ka treguar se pasojat e ndikimit që ekrani mund të ketë te mirëqenia mendore e të miturve nuk janë edhe aq të dukshme nga ç’mendohej, pra edhe nëse kalojnë orë të tëra në shtrat duke parë ekranin e telefonit apo laptopit, rreziku sipas këtij studimi nuk është aq i madh.
“Ne pamë mirëqenien e përgjithshme, por nuk gjetëm ndonjë lidhje mes përdorimit të ekranit digjital për 30 minuta, një orë apo dy orë përpara gjumit, me ndonjë çrregullim të mirëqenies”, tha Amy Orben, pjesë e studiuesve që realizoi kërkimin.
Studimi ka arritur në këtë përfundim pasi analizoi të dhënat e përftuara nga mbikëqyrja e më shumë se 17 mijë adoleshentëve në Britaninë e Madhe, Irlandë dhe Shtetet e Bashkuara. Pas publikimit të studimit, kritikët reaguan menjëherë duke theksuar se disa nga të dhënat e Oksfordit datojnë nga viti 2011.
Ata theksojnë se prej atëherë, koha e përdorimit të ekranit nga adoleshentët dhe natyra e asaj që po shikojnë kanë ndryshuar, duke nënvizuar se ka shumë dëshmi se, edhe pa marrë parasysh orët që të rinjtë shpenzojnë duke parë ekranet, të miturit përballen me materiale mbi çështje të tilla si anoreksia dhe dëmtimi i vetes, të cilat mund ta cënojnë shëndetin mendor të tyre./Opinion.al
