Kryedemokrati Lulzim Basha ka folur ditën e sotme edhe për akuzat e ndërsjellta mes tij dhe ish-kryeministrit Berisha për bashkëpunim me kryeministrin Edi Rama.
Nga ana e tij, Basha ka mohuar të ketë komunikim me kreun e qeverisë, ndërsa ka thënë se “Trekëndëshi i Bermudës”, ku përfshihet kryeministri Rama, Presidenti Meta dhe ish-kryeministri Berisha kanë komunikim të pandërprerë me njeri-tjetrin.
Pyetje: Zoti Basha, pse arriti Partia Demokratike në këtë pozitë që t’i krijojë një pozicion kaq komod kryeministrit Rama? Nga njëra anë ju e konsideroni Sali Berishën si “tub oksigjeni” për qeverisjen e Edi Ramës, nga ana tjetër Sali Berisha ju akuzon ju se me Policinë e Edi Ramës po mbroni selinë e Partisë Demokratike. Ju në fakt keni ndonjë komunikim drejtpërdrejtë me kryeministrin?
Lulzim Basha: Komunikimi im i vetëm është me qytetarët, është me demokratët. Komunikimi i trekëndëshit të Bermudës është i pandërprerë. Gjërat janë të ndara, duhet të kesh sytë e mbyllur, veshët e mbyllura dhe as dy pare mend në kokë, mos ta kuptosh.
