Një ditë pasi gazetari invetigativ, Artan Hoxha denoncoi hyrjen sekrete të një deputeti në burgun e sigurisë së lartë, mediat kanë nxjerr edhe alibitë e para rreth emrit të deputetit. Lapsi.al shkruan se deputeti në fjalë, mund të jetë vetë kreu i komisionit të Sigurisë, Spartak Braho, njëherësh eksponent i lartë i LSI.
Siç deklaroi dje Artan Hoxha, deputeti enigmatik që kërkoi madje edhe fikjen e kamerave mendohet se ka takuar Dritan Dajtin në qeli. Por në të njëjtin burg ndodhet edhe Kastriot Ismailaj, ish-administratori i kompanisë DIA, implikuar në aferën e CEZ. Pra personi që u përfol për afera me Ilir Metën.
Ndërkohë gazeta “Panorama” shkruan se Shërbimi i Kontrollit të Brendshëm po bën verifikime në burg pas deklaratës së gazetarit Hoxha.
Nga ana tjetër, “Lapsi” referuar burimeve të veta shkruan se “ka patur raste të vizitave të deputetëve në burg, por jo takime me Dritan Dajtin. Sipas këtyre burimeve, kreu i komisionit të Sigurisë, Spartak Braho, ka qenë dy herë në burgun 302 në Tiranë. Deputeti Spartak Braho, është takuar me ish zv/drejtorin e Burgjeve, Iljaz Labin, nën hetim për akuzën e korrupsionit, me të cilin ka marradhënie dhe miqësi familjare”.
Dyshime të shumta ka me këtë denoncim të Artan Hoxhës. Çfarë do një deputet dhe për më tepër Kryetari i Komisionit të Sigurisë (nëse është Ai) në një burg ku gjenden emra të njohur të krimit…?! /Opinion.al
