Kastriot Gjuzi, njeriu i cili akuzohet se mbrëmjen e 10 Prillit ekzekutoi të riun Mario Majollari, është marrë në pyetje dy herë nga grupi hetimor në Tiranë, por nuk ka pranuar të flasë dhe as nuk ka kërkuar një avokat.
Ndërkohë mësohet se policia ka shpallur në kërkim një person, i cili dyshohet se e ka ndihmuar Gjuzin që të arratiset.
40-vjeçari u arrestua orët e vona të së mërkurës nga policia e Kosovës, pasi kaloi në mënyrë të jashtëligjshme kufirin jeshil. Kastriot Gjuzi, i njohur edhe me emrin e mëparshem Petrit Gjuzi, u shpall në kërkim një ditë pas ngjarjes së rëndë.
Ai dyshohet se e vrau 28-vjeçarin Mario Majollari për gjakmarrje, pasi në vitin 2000 babai i të riut, Avni Majollari, vrau vëllain e Kastriot Gjuzit, Ilir Gjuzin dhe kushëririn e gruas së tij, Armand Nelën.
