Majlinda Bregu, e vënë këto ditë në qendër të vemendjes pas debatit që pati në Bruksel me kolegun e saj Aldo Bumçi, ka patur disa gjëra për të sqaruar sot në sallën e Parlamentit.
Me mënyrën dhe fjalorin si të një eurodeputeteje, ajo u përpoq të gjente fajtorët e mosintegrimit të Shqipërisë tek e gjithë klasa politike shqiptare.
E nisi me qëndrimin e dikurshëm të Edi Ramës në opozitë duke mos kursyer dhe fjalitë pa emërtim të saktë edhe për kryetarin aktual të opozitës. Dhe ndoshta ka patur të drejtë në të gjithë analizën e saj, përveç faktit që zonja Bregu ka qenë dhe është pjesë aktive jo vetëm e politikës shqiptare, por në veçanti e proçesit të integrimit.
“Askush nuk bëhet hero në këtë vend, pse ka shërbyer për këtë proces. Përkundrazi rrezikon të bëhet armik nëse prish apo bllokon atë. Ka politikanë kolegë në këtë sallë dhe jashtë saj, që kanë hyrë në politikë për shkak të militantizmit konseguent partiak. Ka të tjerë që kanë hyrë për shkak se janë biznesemenë apo artistë. Ka të tjerë që i ka seleksionuar debati politik dhe i ka bërë të pëlqyer nga populli si oratorë. Ka nacionaliste dhe përfaqësues pakicash që duan të perfaqësohen me të drejtë. Të gjithë janë në politikë për një arsye. Unë jam në politikë dhe kam zgjedhur Partine Demokratike për kete bindje: e dua Shqipërine si gjithë Europa”. Me këto fjali zonja Bregu ka justifikuar edhe votën e saj kundër qëndrimit të grupit të deputetëve demokratë që ishin me të në Bruksel.
Dhe kjo është padyshim një e drejtë e saj për të votuar dhe mbajtur qëndrim të ndryshëm nga grupi edhe pse në fakt ajo e njeh mirë funksionimin e partive dhe thyerjen e qëndrimit të vendosur nga lidershipi. Kjo e drejtë i ka dhënë sot zë edhe qëndrimit të saj kundër qendrimit zyrtar të PD kur nga foltorja deklaroi se: “As do të jem ndonjë ditë kundër vetes dhe për asnjë arsye apo çmim, mbi të nuk do të shkelja. Dhe kjo e ka nje çmim. Cmimin e respektit ndaj vetes” .
Majlinda Bregu nuk ka treguar se çfarë çmimi i është ofruar për këtë, por la të kuptohet se nuk pajtohet me PD dhe qëndrimin e saj të fundit: “Kundershtari nuk luftohet duke u bërë si ai. Unë nuk do t’ia falja vetes sot, të veproja si Edi Rama dje! Nuk ka asgje më të rëndësishme, më jetike, më garantuese, më shpresëndërtuese, më standart vendosëse, për shqiptarët se sa mos ndërprerja e rrugëtimit të tyre Europian”.
Kështu ish-ministrja e Integrimit ka shpallur publikisht “divorcin” e saj me qëndrimin e partisë që e ka zgjedhur deputete. Dhe për këtë në fakt ndoshta mjaftonte dhe “sherri” që ajo pati me deputetin tjetër Aldo Bumçi.
Deputetja e PD duket se ka bërë zgjedhjen e saj mes partisë dhe integrimit duke zgjedhur specialitetin e saj, atë për të cilën dhe u zgjodh nga ish kryeministri Sali Berisha si ministre, pikërisht integrimin e Shqipërisë. “Nëse ndonjë fanatik intrigash dhe hargalisës fjalësh, e quan qëndrimin tim të pandryshuar për ecjen para të këtij procesi si shkelje të parimeve të demokratit të denjë apo partikut ushtar, nje blasfemi, nuk kam ç’i them, vetëm durim: të gjitha të vërtetat e mëdha nisin si blasfemi”.
Por më shumë se durimi është koha ajo që nxjerr të vërtetat në pah. E duke patur parasysh një vend të vogël e me politikë kryesisht thashethemesh apo telefonatash, ndoshta do të duhet më pak kohë se zakonisht për të parë nëse zgjedhja e zonjës Bregu ishte e duhura apo jo. /Opinion.al
