Publicisti dhe gazetari Baton Haxhiu ka thënë para disa ditësh se kryeparlamentari dhe ushtruesi i detyrës së kryetarit të PDK-së, Kadri Veseli i ka dyert hapur në Shtetet e Bashkuara të Amerikës për shkak se gjatë kohës sa ishte udhëheqës i SHIK-ut (Shërbimi Informativ i Kosovës) ai mbrojti Ambasadën Amerikane në Kosovë nga radikalët islamik dhe i luftoi ata.
Sipas Haxhiut, SHIK-u misionin kryesor dhe punën kryesore e ka pasur t’i luftoj radikalët islamik dhe kësaj ia ka arritur, prandaj edhe Kadri Veseli vlerësohet lartë nga Amerika, raporton Indeksonline.
E ndonëse janë bërë tetë vjet që kur zyrtarisht SHIK-u është shuar, njohësit e çështjeve të sigurisë nuk pranojnë të flasin shumë rreth kësaj organizate.
Njohësi i çështjeve të sigurisë, Florian Qehaja ka thënë për Indeksonline se organizata SHIK pas lufte kishte mbledhur informacione që kishin të bëjnë me monitorimin e veprimtarive të ekstremizmit fetar, që ishte në rritje atë kohë.
“SHIK-u, si një organizate ilegale, por thjesht operative, mendohet se ka kryer detyra të mbledhjes së informacioneve të cilat kryesisht kishin të bënin me monitorimin e veprimtarive të ekstremizmit fetar, i cili në Kosovë ishte në rritje në periudhën e pasluftës”, ka thënë Qehaja.
Sipas tij, kjo ishte detyra mbase e vetmja e cila i ka mbajtur ata në kontakt me disa struktura ndërkombëtare të inteligjencës, të cilat kishin nevojë për informacione “të dorës së parë”, të cilat vinin nga zyrtarët dhe informatorët që e njihnin kontekstin vendor dhe kanë arritur të krijojnë kontakte brenda qarqeve konservative islamike.
“Mirëpo unë nuk mendoj që ndonjë bashkëpunim në sferën e inteligjencës ka pasur për rezultat ndryshimin e qëndrimit tek ndërkombëtaret lidhur me statusin e këtij formacioni, pra të një organizate e cila faktikisht ka qenë ilegale”, ka theksuar Qehaja.
Naim Maloku, njohës i çështjeve të sigurisë ka thënë për Indeksonline se nuk mund të jap deklaratë për diçka që nuk është në dijeni.
“Nuk i di ato sene, nuk kisha mundur të jap kurrfarë deklarate sepse nuk kam njohuri, e për diçka që nuk di, nuk flas”, ka thënë Maloku.
Edhe Bejtush Gashi, njohës i çështjeve të sigurisë nuk ka pranuar të komentoj veprimtarinë e Veselit dhe afërsinë e tij me SHBA-të.
“Është çështje që lidhet me personalitetin e tij dhe nuk di çka të them më shumë për këtë”, ka thënë shkurt Gashi. /Indeksonline/
