Që nga takimi që i kërkoi përpara pushimeve të verës, Presidenti Ilir Meta është ende duke e pritur kryeministrin Edi Rama. Kreu i shtetit tha se për një kohë të gjatë nuk e ka takuar shefin e qeverisë, megjithatë është i hapur dhe e pret në takim.
“Nuk kam patur mundësi të takohem, nuk kam ndonjë shqetësim, unë akoma vazhdoj, pres. Kjo është detyra ime”, tha Meta.
Ai hodhi kritika të forta ndaj të liderëve, Ramës dhe Bashës për të cilët tha se gjatë kësaj kohe iu ka munguar përgjegjshmëria.
“Nuk ka gjë më të mirë së sa dashuria, por më e rëndësishme është përgjegjshmëria. Unë mendoj që ata të dy kanë reflektuar një mungesë të madhe të përgjegjësisë së përbashkët dhe në mënyrë të veçantë gjatë këtij viti. Kjo ka qenë një situatë tërësisht artificiale. Ky është një antagonizëm i imponuar nga lart, për të mbajtur Shqipërinë në një situatë ngërçi”, theksoi Meta./ Opinion.al
