Kryeministri Edi Rama i ka dërguar Presidentit të Republikës propozimet e reja për postet ministrore të lëna vakant, pas shkarkimit të katër ministrave. Midis këtyre propozimeve është edhe emri i z. Fatmir Xhafaj në postin e Ministrit të Brendshëm; propozim i cili ka ngjallur edhe debate të forta ditët e fundit përsa i përket të kaluarës së tij në shërbim të drejtësisë së regjimit komunist. Në kurrikulumin e tij z, Xhafaj ka shënuar se nga viti 1982 deri në vitin1986 ka punuar si jurist në sistemin e drejtësisë. Por vetëm kaq, pa specifikuar konkretisht se ku ka punuar si jurist; siç tregon edhe jetëshkrimi i tij i publikuar në faqen zyrtare të Partisë Socialiste.
Ndërkohë që në këtë jëtëshkrim mungon aktiviteti nga viti 1986 deri në vitin 1990. Në fakt media këto ditë përpos që ka risjellë në vëmendje një foto të z. Xhafaj në krah të diktatorit Enver Hoxha, dalë në tribunën e byrosë në paradën e 1 majit, ka hulumtuar edhe mbi të shkuarën e z. Xhafaj në drejtësinë e regjimit komunist. Nga ku rezulton se nga viti 1986 deri në vitin 1990 z. Xhafaj ka punuar si hetues në Degën e Brendshme të Rrethit Krujë si edhe ka qenë anëtar i Komitetit Qendror të Bashkimit të Rinisë së Punës së Shqipërisë. Ky fakt është përforcuar këto ditë edhe nga akuzat që i bëjnë familjarë të Arben Dukës, ish-I burgosur politik, të cilët bëjnë fajtor drejtpërdrejt z. Xhafaj si hetues i çështjes për dënimin politik, torturimin dhe persekutimin që ju bë të afërmit dhe familjes së tyre. Pyetja që lind në një rast të tillë është; nëse z. Xhafaj është i përshirë në krimet e drejtësisë së regjimit të kaluar, a duhet ta dekretojë Presidenti i Republikës, emrin e tij si Ministër i Brendshëm?!
/Opinion.al
