Një sërë pr/ligjesh dhe vendime të rëndësishme janë sot në rendin e ditës të seancës plenare që mblidhet në orën 10:00, mes tyre veçojmë listën e re për anëtarë të KLP dhe KLGJ. Kujtojmë se javën e kaluar opozita votoi kundër dhe kjo gjë pritet të ndodhë edhe ditën e sotme.
Lista me 10 kandidatët duhet të miratohet në seancë me 2/3 e votave, pra duhet të marrin 93 vota. Por Opinion.al ka mësuar se Partia Demokratike nuk do ta ngre kartonin jeshil as për emrat e rinj që dolën nga shorti II i komisionit ad-hoc.
Debati i opozitës pritet të përqendrohet tek dy çështjet më të debatuara politike të këtyre ditëve, ekstradimi i financierit të Habilajve, Nezar Seitaj si dhe tek marrëveshja me Greqinë për kufirin detar.
Po kështu në rendin e ditës së parlamentit janë ndryshimet ligjore për arsimin parauniversitar dhe projektligj për negocimin me shoqëritë turke për ndërtimin e aeroportit të Vlorës.
Lista e kandidatëve për në KLP dhe KLGj
Për Këshillin e Lartë Gjyqësor kandidatët janë: Fatos Lazimi dhe Fatmira Luli nga Avokatia. Maksim Qoku dhe Mirela Bogdani nga radhët e pedagogëve, ndërsa nga shoqëria civile Naureda Llagani.
Për KLP-në, kandidatët nga Avokatia janë Gëzim Allaraj dhe Floreta Gjini, nga pedagogët Eneida Sema dhe Gent Ibrahimi, ndësa nga shoqëria civile Andi Murataj.
/Opinion.al
