Lista Serbe ka marrë vendimin për të dalë nga Qeveria e Kosovës. Ky vendim praktikisht ka rrëzuar mazhorancën qeverisëse të drejtuar nga Kryeministri Ramush Haradinaj. “Nuk do të jap dorëheqjen!”, tha ky u fundit por pa treguar si do të mbjetojë tashmë që në parlament mazhoranca ka 10 deputetë më pak.
“Vendimi për tërheqje nga Qeveria e Kosovës u mor unanimisht, në mënyrë të përbashkët. Këtë vendim ia kemi thënë sot presidentit Vuçiç dhe na ka mbështetur”, bëri të ditur zëvendëskryeministri i Kosovës, Dalibor Jevtiç.
Ndryshe e sheh, Haradinaj. Kryeministri tha se pas këtyre zhvillimeve nuk e ka ndërmend të japë dorëheqje.
“Pra, as nuk ka rend të zgjedhjeve as nuk ka rënie të Qeverisë, po kjo nuk na bën as më të lumtur as më të zhgënjyer. Unë shpresoj se Lista Serbe të reflektojë sepse veprime e njëanshme, shkëputja e bashkëpunimi nuk janë zgjidhje. Zgjidhja e vetme është bashkëpunimi, dialogu këto e bëjnë progresin në Kosovë si në jug si në veri. Kam qenë dhe mbetem i përkushtuar për integrimin e gjithë qytetarëve dhe vendit dhe mendoj se kjo është më rendësi”, është shprehur Haradinaj.
Ai ka thënë se ka marrë përkrahjen e shumë deputetëve, pas largimit të Listës Serbe nga Qeveria e Kosovës.
Lista Serbe, ka një grup parlamentar prej 10 deputetëve, prej të cilëve, nëntë janë serbë dhe një nga komuniteti goran.
Po ashtu, kjo Listë ka pasur poste ministrore dhe zëvendësministrore në Qeverinë e Kosovës si dhe udhëheq me shumicën e komunave ku serbët përbëjnë shumicën.
Largimi i Listës Serbe nga Qeveria e Kosovës, do të ndikojë që koalicioni aktual qeverisës të humbë shumicën në Kuvendin e Kosovës, duke vënë në rrezik mbijetesën e Qeverisë që udhëhiqet nga kryeministri Ramush Haradinaj, gjë që mund të çojë vendin drejt zgjedhjeve të parakohshme, thonë analistët potitik të Kosovës.
/Opinion.al
