Kjo fundjavë do të jetë vendimtare, sa i përket krizës politike. Një marrëveshje, apo një shkallë më sipër në tensionin politik?
Gjithçka do të jetë në dorë të liderëve. Një ditë pasi presidenti Ilir Meta u bëri apel të gjitha institucioneve dhe partive politike të zbatojnë dekretin për zhvillimin e zgjedhjeve në 13 tetor, opozita duket se ka vendosur të hedhë hapin e parë në mbështetje të këtij dekreti.
Vetë lideri i opozitës Lulzim Basha e ka cilësuar si datën e vetme kushtetuese 13 tetorin dhe në këtë frymë pritet që partitë e koalicionit opozitar të regjistrohen pranë KQZ si pjesëmarrëse në zgjedhje. Një vendim zyrtar ende nuk ka, por burime kanë thënë se Basha ka diskutuar me aleatët.
Afati për regjistrimin, sipas kodit zgjedhor skadon të hënën, e për këtë arsye pritet që këtë hap opozita ta hedhë këto ditë.
Po ashtu duhet që kryetari i KQZ, Klement Zguri të thërrasë mbledhjen këtij institucioni, në lidhje me dekretin e presidenti për 13 tetorin. Të kontaktuar nga Opinion.al, këtë të premte, nga KQZ thanë se nuk ka asnjë njoftim për mbledhje, por nuk rrëzuan as mundësinë që të zhvillohet një mbledhje.
Nga ana tjetër kryeministri Edi Rama, që drejton mazhorancën në konferencën e tij të fundit para pushimeve hodhi poshtë idenë e mbajtjes së zgjedhjeve të reja, ndërsa theksoi se stacioni i radhës do të jetë qershori i 2021.
Megjithatë politika shqiptare ka treguar se marrëveshjet arrihen në minutë të fundit, ndaj kurrë mos thuaj kurrë. / Opinion.al
