Pas konventës ku prezantoi partinë e tij ‘Mundësia’, deputeti Agron Shehaj ka dhënë një intervistë për emisjonin “Opinion”, në TV Klan. Ndër të tjera, Shehaj u pyet edhe për situatën e opozitës dhe faktin se si do të ndikojë hyrja e një partie të re në elektorat. Sipas deputetit, dobësimi i opozitës ka ardhur për shkak të projekteve afatshkurtra që ajo ka patur dhe kjo ka sjellë humbjen e shumë votave.
Ju vini si një parti e djathtë, fakt të cilin e keni publikuar tashmë. A mendoni se në situatën ku është opozita e sotme, hyrja e një partie të re të djathtë do ta dobësonte edhe më shumë?
Agron Shehaj: Kjo është një gjë që diskututohet shpesh kur jemi parti të reja politike. Unë do thosha që nuk shikoj vetëm zgjedhjet e ardhshme. Eshtë kjo tendenca për të parë vetëm efektet mbi zgjedhjet e ardhshme, pa parë përtej zgjedhjeve të ardhshme. Projekti politikë që ne po ndërtojmë, sigurisht që shikon rezultatin e zgjedhjeve të ardhshme, edhe ai është një rezultat i rëndësishëm. Por ky është një projekt politikë afatgjatë. Nëse jemi në këtë gjendje është sepse opozita nuk ka patur një projekt afatgjatë, por ka menduar gjithmonë për zgjedhjet e radhës.
Dhe në një farë mënyrë, ka sakrifikuar me vendimet që ka marrë, ka sakrifikuar besueshmërinë, thjesht për të maksimizuar rezultatin, thjesht për të maksimizuar shansin për të fituar në zgjedhjet e ardhshme. Dhe kjo ka bërë që opozita të humbasi besueshmërinë. Sepse ka menduar vetëm zgjedhjet e ardhshme. Kemi një pjesë shumë të madhe të elektoratit që është zhgënjyer, që nuk ka ndërmend të dali në votime nëse nuk ka një ndryshim. Dhe ky elektorat nëse nuk ka parti të re, nëse nuk ka parti te të cilat mund të identifikohen, ne praktikisht rrezikojmë t’i humbasim ato vota.
Tani unë nuk e di të them se cili do jetë më i madh efekti që e dëmton opozitën apo efekti pozitiv që e ndihmon opozitën që të shkoj të marri vota, atje ku ato vota nuk i ka me dhe i ka humbur prej kohësh, dhe me kalimin e kohës i ka humbur gjithnjë e më shumë.
