Pas ridërgimit nga Rama të propozimit për dekretimin e Sandër Lleshit si Ministër i Brendshëm, Presidenti Meta ka reaguar edhe njëherë në lidhje me çështjen duke lënë të hapur mundësinë e bashkëpunimit.
Nëpërmjet një reagimi për shtyp, zëdhënësi i Presidentit të Republikës Tedi Blushim sqaron se:
“Prej ditës së djeshme, pas mbërritjes së propozimit, Presidenti i Republikës Sh.T.Z Ilir Meta ka nisur procesin e bashkëpunimit me institucionet përgjegjëse për të marrë përgjigje të qarta, të plota dhe shteruese ndaj të gjitha çështjeve për të cilat Presidenti nuk mundi të sqarohej herën e parë, pavarësisht nga përpjekjet e tij të vazhdueshme për bashkëpunim.
Lidhur me këtë proces të ri, Presidenti ka vendosur të informojë mbi kërkesat e tij edhe Kryetarin e Kuvendit, pasi procedura e emërimit të një ministri është proces bashkëpunimi i detyrueshëm e kushtetues midis tre institucioneve (Kryeministri, Presidenti, Kuvendi).
Presidenti Meta është i vendosur të përmbushë përgjegjësitë e tij kushtetuese me rigorozitet dhe brenda afateve kushtetuese, vetëm në interes të respektimit të Kushtetutës dhe forcimit të sigurisë kombëtare ku Ministria e Brendshme ka një rol kyç.”
A është ky reagim një hap pas në qëndrimin e Presidencës. Kjo mbetet për tu parë në afatin 7 ditor që Presidenca ka për të shqyrtuar edhe njëherë figurën e Sandër Lleshit për Ministër të Brendshëm.
